आज दून विश्वविद्यालय के रंगमंच एवं लोक कला प्रदर्शन विभाग की तरफसी अंतर्राष्ट्रीय मातृभाषा दिवस बहुत खुशी व उमंग का साथ मनाई।
गढवाली अर कुमौनी छात्रों न बहुतै बढ़िया कविता, गीतू अर भाषण का माध्यम सी सबकु मन खुश करी,अर यनु संदेश दिनी कि हमुतै अपणी भाषा जरूर बोल्नी चैन्दी यन करण सी हमारी संस्कृति बच्ची राली।
हमारा जल जंगल ज़मीन बच्ची राली। आज कु कार्यक्रम न सबुतै भावुक कर दिनी।
ये मौका पर रंगमंच विभाग का अध्यापक डॉ अजीत पंवार अर डॉ कैलाश कंडवाल न सब्यो तै अपणी भाषा कु सम्मान अर आदर करण की प्रेरणा दिनी।
ये मौका पर विश्वविद्यालय की कुलपति डॉ सुरेखा डंगवाल न बोली कि हमारी लोकभाषा हमारी संस्कृति की जननी छः।यान्की रक्षा करण तथा यीतै बढौण की खातिर हम सब्यो तै अगाड़ी औण पडलु ।साथ ही हमतै अपणी मातृभाषा सी प्यार करण चैदू।
साथ ही निदेशक, आइक्यूएसी तथा प्रो एच सी पुरोहित न भी अपणा विचार व्यक्त करेन अर बोली कि मातृभाषा का संरक्षण का खातिर ठोस कदम उठौण पडला। उन छात्रों तै अपणी भाषा तै रोज अपणौण क बोली। कार्यक्रम का समापन का दौरान सब्यो न संकल्प लिनी कि हम अपणी भाषा तै बचौण का खातिर प्रयासरत रौला। और
अपणी भाषा मा बात करला।
कार्यक्रम मजी राजेश भारद्वाज, ज्योत्सना, सरिता भट्ट, सरिता बहुगुणा,अन्जेश, वैशाली नेगी का साथ साथ कयी छात्रों न भाग लिनी ।
रंगमंच एवं लोक प्रदर्शन कला विभाग
दून विश्वविद्यालय देहरादून
